Pingsten un de Heilige Geist hören tosamen. Könen wi daar vandaag noch wat mit anfangen? Wat sall dat wesen – de Geist? Un wat hett dat mit uns to doon? In uns düütske Spraak geistert de Geist as Woord up verscheden Aarden: Well buten Künn is, de is van all gode Geisters verlaten.
Geistlos is een, de langwielig herumkauelt. Well Füür un Flamm för en Saak brannt, de nömen wi „begeistert“. Aber ok dat: De Geisterfahrer is up de verkehrte Sied van de Autobahn unnerwegens.
En Geisterstadt sünd Husen, de löss stahnt. Un in de Geisterbahn up de Pingstmarkt sallen wi uns verfehren un gruseln. Mitunner fehlt uns de „Geistesblitz“, de Idee, de uns wiederkomen lett. De „Geist“ is för Kinner de Spöök, de savends in ‘t Düüstern unner ´t Bett sitt un benstert worden mutt. Un faak betekent man uns Pastorinnen un Pastoren as „Geistliche“. Wi marken, „Geist“, dat is en Woord mit vööl Bedüdens.
In de Bibel hett Geist mit Gott to doon. De Kraft, de van Gott utgeiht, dat is de Heilige Geist: de Geist van Gott un de Geist van Jesus Christus, de Söhn. Disse Geist van Gott hett keen Gesicht, un doch könen wi hum gewahr worden. Wi mutten uns blot fragen: Welke Geist stüürt uns? Welke Geist nehmen wi wahr in uns un um uns to? Mennigmaal bestimmt Minsken de Sörg, wat verkehrt to maken. Angst daarvör, dat wi nich richtig maken, wat Annern van uns verwachten. Of Nood, dat wi verlesen, wat wi uns mit uns lüttje Kraft un Fliet upbaut hebben. Sükse Sörgen sünd en slechten Geist, en Ungeist, de uns Minsken unfreei maakt un kört hollt. Un daar is so vööl Ungeist an ´t Wark in uns Welt, dat wi de Biller van Krieg, Dood un Verdrieven heel nich mehr vullhollen könen.
Wat drifft en Mann, en Land, waar Minsken in Free in hör Dörpen un Kuntreien leven un arbeiden, platttomaken? Wat drifft en jung Minsk, 19 Kinner un twee Mesters in en School doodtoscheten?
Pingsten vertellt, dat de Heilige Geist van Gott kummt. Sien Kenntekens sünd jüüst dat Tegendeel van dat, wat wi beleven. De Heilige Geist föhrt de Minschen an Pingsten tosamen un hollt hör binanner! De Heilige Geist verbindt Minsken mit Gott un mitnanner, un brengt neei Vertroen un maakt de Döör open, dat wat Nejes anfangen kann. Minsken, de sük van disse Geist van Gott ansteken un bewegen laten, kriegen Kraft, de utstrahlt. Dat marken annern. Denn daar geiht wat Goods van ut. En Gesicht van Gott sien Geist is de Leevde. Leevde kann Leven verännern, ja, de hele Welt. Stellen wi uns vör, wo de Welt utsehn würr, wenn Gott sien Geist van Leevde de Bahnwiesder weer!Daar sünd wi noch wied van weg. Man laat uns nich uphollen, in de lüttje Welt, in de wi mitnanner leven, in uns Gemeenden, in uns Dörpen un in uns Stadt, daar, waar wi wirken un mit anpacken könen, in en gode Geist mitnanner to leven. Daarmit disse Geist un sien Leevde up annern utstrahlen könen.Gott sien Heilige Geist is en Geist vull Leevde. Leevde deelt un denkt an de anner. Um disse Geist willen wi bidden. Un Pingsten fieren, dat Gott sien Geist in disse Welt bi uns blifft. Wi hemmen hum so nödig.
Pastorin Angelika Scheepker, Aurich-Lamberti
