Desktop

Tablet / Mobil

Desktop

Tablet / Mobil

4. September 2022 Klopp an de rechte Dör!

Nu, wor de Kinner weer na´d Schkool henmutten, prooten wi` n´Bült van de mooie Fohrten, de wi de lesde Johren mit Wichter un Jungs hier ut Gemeend maaken dürssen. Wat du dor all beleeben kannst! Wi wassen mit fieftig  Jung Lü uns Kark bi mooiste Sömmerweer in Norwegen up Tour. Na ´n lekker Middageeten gungen lüttje Klottjes van Jungs un Wichter mitnanner to un melden sück bi uns off. Eens was d´r bi: wat se ook maaken wullen, tegen söben Ühr sullen se binnen Latten wesen. Un 47 wassen dat ook, man dree fehlen. Ook neegen Ühr nix, teihn Ühr nix.  Een van de Ollerden hett hör söcht un sach hör middent in´d Wald sitten, se vertellen sück wat un harren de Tied vergeeten. Se hemm hum heel neet in`d Luur kreegen. He gung heel sacht in uns Huus, mook all Fensters un Dören dicht un overall Lücht ut. He hett sück unner´t Trappen verstoppt un hett offwacht, dat de oll Bummelmorsen na Huus hen koomen deen. Na´n heel`Sett  kweemen se antuffeln. Se kloppden an all Fensters van hör Frünnen un wullen dör´d Fenster rin, man dor dee sück nix. Bleev all düster un pottendicht. De anner Wichter un Jungs harren sück offproot un wullen hör neet rinlaaten, dreeunhalv Stünn to laat. Tolesd hulp dat nix, se mussen heel benaut an de groode Dör kloppen.  Off de wall opengung? Ja, dat dee he. Dor satt ja een un luur up hör. Un se kweemen dor achter, wat se mörgens unner Gotts Woort hört harren: Klopp bi mi an, seggt Jesus. Ik laat di neet hangen. Ik maak di alltied de Döör open.Mennig Mal koomen wi uns ook ja so för, dat nix so recht vörut geiht. All de Dören, de wi geern open harren, sünt pottendicht. Du sittst fast un kannst keeneen Kant an. Maak dat nett as de Jungs in´d Sömmer: klopp an de groote, de rechte Dör  – uns leev Heer, de luurt all up di un will nix leever as di helpen. Klopp hi hum an! Man driest to. Du sallt di wunnern.

Jürgen Hoogstraat, Pastor in Victorbur