Desktop

Tablet / Mobil

Desktop

Tablet / Mobil

19. März 2023 De Weeken vör Ostern

De Weeken vör Ostern – dat sünt heel besünner Weeken! Dat hebb ik nu weer unnerfunnen, as wie de lede Stappen up Kunfermation daalgungen. Dat is bi uns ja dicht binanner, Kunfemation un denn de Osterdagen.  All de Wichter un Jungs beleben in disse Week sovöl Besünners för hör Lebend. Dor sünt se düchdig upgeregt, man du kannst ook n´heel bült lehren van hör.

Een Kunfemand was de Dagen heel dör´t Wind un hett mi kört vört Karktied fragt, he wull so geern noch eem upseggen, wat he löben dee. „Denn bün ik futt neet so upgeregt“, see he. Und dnn gung´t los: „Ich glaube an den Vater“ un wieder un wieder, un denn se he: „Gekreuzigt für Pontius Pilatus und am dritten Tage auferstanden von den Toten…“ He harr d´r so´n Gang up, dat ik hum bolt neet to stahn kreeg…wi hemm noch mal mitnanner upseggt un denn gung´t beter.

As he all lang weg was, gung mi dat weer un weer dör´t Kopp. Seker, dat was verkehrt west, wat he in all sein Upreegen seggt harr. Gekreuzigt für Pontius Pilatus und am dritten Tage auferstanden…“ Man ik hebb völ van de Jung lehrt. Wi deelen uns de Lü ja alltied mooi in: de, de wi geern mögen un de Schkuberjacken, wor wi nix van hollen. Un mennig Mal denken wi: ja, de wi geern mögen, de mag de Heer Jesus ook geern. Man de Jung wuss beter in sein Vergrelltheid: Pontius Pilatus hett ja nu wir´s keen gaud Naam, he hett Jesus mit an´d Krüz brocht. Man dat is Ostern:  ook för hum is Jesus stürben. Ook för hum is Jesus upstahn. Ook för so mennig anner, wor wi nix van meenen.  Hest dor all mal um docht?

Jürgen Hoogstraat, Victorbur