Is man eeerst n´poor Week her, do sünt wi fraagt worden hier in Oostfreesland, welke Bakker wall dat lekkerste Schwartbrod backen deiht! Kunnst sogor wat bi winnen. Man dat is heel neet so eenfach to seggen. De een seggt so, de anner so. Man welke Brot du ook am leevsten mögen deihst – eens steiht fast: sünner Schwartbrod löppt nix in Oostfreesland. Givt´n heel Bült Lü – un dor hören wi ook to – de nehmen ook wall n´Pund of twee van dat beste Schwartbrod mit, geiht´t mal up Tour.
All dat sööte Kraam un de Lipplabbereee, de di unnerwegs so vörsett word, dat is wall wat för n Mal, man wor du van leben sallt, dor mutt ook wat insitten. Un wor sitt rechtschlaapen wat in? In Schwartbroot. Dor givst du mi seker Recht.
Un nett so as wi Schwartbrood bruken för uns Liev un Knaaken, bruuken wi ook Schwartbrood för uns Hart un Seel. Dat weet uns leev Vader ook, he kiekt in uns Hart bit heel unnern up Grund un sücht, wat wi nödeg sünt.
Wat Minsken so prooten un doon, dor worden wi neet satt van, wo faak hemm wi dat all unnerfunnen. Du hörst dit un du hörst dat un n´ Settje denkst du: na, dat klingt good. Man dat is ook nett so fell weer weg, dat sööte Kraam un de Lipplabberee. Wi bruken wat, wat, wor wi uns Stöhn un Mood to leben uthaalen können. Un dat kann bloot van boben koomen.
Uns leeve Heer kann dat mennig Mal heel neet mit ankieken, wo wi so sacht van binnen verschmachten. Un he hett wall wusst: dor mutt wat koomen, dat ik mien schmachtlappige Volk in Gang hollen kann, anners sünt se verloren. Un dor mutt neet irgendwat koomen, dor mutt ik süllmst achterto. Hum kann dat so begrooten, kriegen wi beid neet dat, wat uns Lebend wir´s in Gang hollen kann. Schwartbrod mutt d´r her – Lebensbrood. Un dor hett he Jesus um stüürt.
Un Jesus seggt uns dat liek vör´t Kopp: Ik sün dat Lebensbrood. De bi mi kummt, de kriegt nooit weer Schmach tun well an mi lövt, de hövt ook nooit neet Dörst lieden (Johannes 6,35).
Is dat neet wat? Du hövst neet up Böskupp, du hövst dor neet mit Schweet vör´d Kopp achteranjagen – uns leeve Vader sein Schwartbrood kummt na di hen. Un will di Stöhn un Mood to leben doon – laat di satt un blied maaken mit Schwartbrood van boben. Dor is man een Bakker, de di dat doon kann. De backt so, as du dat bruukst un as ik dat bruuk. Nehm dat an un du hest wunnen, wat dien Leben in Gang hollt, nu un alltied.
Jürgen Hoogstraat, Pestor in Vitterbur