Mennig een van uns plattdütsche Theaterfrünnen hett dat Stück van Jens Exler all sehn off sogor mitspöölt: „Un boben wohnen Engels…“ Dat gav´t ook all van´t Ohnsorgtheater in Hambörg. Twee olle Damkes, Elvira un Helene Engel, wohnen boben in dat Huus van Baas Babbel. Se will´n geern n´anner wat grooterde Wohnen hemm un nu denken se sück een Spijökenkraam na´d anner ut, kloppen s´nachts mit dikke Booken up Tafel un verfehren all annern in dat Huus. Se heeten wall van „Engel“ , man se doon d´r neet na. Dat sünt so Engel´s.
As wi dat Stück annerlesdens mal weer to sehn kreegen, mussen wi an disse Sönndag denken: de Engel-Sönndag – Michaelis! All van froher her word 29. September um de Engels docht un wat de so doon. Vör uns Grootollen was Michaelis in Oostfreesland elke Johr de Dag, wor se de Landhüür betaalen deen, was dat Korn un all anner good utfallen. So bleev ook lang na de katholske Tieden bi uns de Engel Michael mit sien anner Helpers noch in´d Klenner stahn un deiht dat bit vandage.
Man wo is dat mit de Engels? Neet de ut Theater, man de rechtschkaapen Engels? Wohnen de ook bloot boben in ´d Hemel? Sünt Engels bloot Spijökenkraam ut olle Tieden? Wo sitt dat d´rmit?
Wenn wi in Gotts Woort kieken, könn´wi ´n heel Bült over de Engels gewohr worden. Wenn´t drupp ankummt, sünt se dor. Man se doon neet, wat hör nett in´t Kopp kummt un se verfehren ook keen Lü so as de Daamkes in´t Theater – nee, de hemm´n heel anner Bahntje. Uns leeve Heer hett`d over de Engels to seggen un he stüürt hör dor hen wor´t Nood deit. Se sünt de Heer sien Böskuppsloopers un se hemm keen anner Bahntje as uns van uns Heer to vertellen un to wiesen, wat he kann. Se wohnen ook neet bloot boben un kieken up uns daal. Nee, uns leeve Heer stüürt hör elke Dag weer up Padd, dat se uns helpen. Un wenn se koomen, uns Heer sien Engels, alleen off ook mal in ´n Klottje mitnanner, hemm se n´heel besünner Böskupp vör uns: Weest neet bang! Weest neet bang för dat, wat kummt! Wees neet bang för dat Leben! Weest neet bang för de Dood! De Heer regeert un hett´d to seggen. He denkt ook um di un stüürt sien Engels nett dorhen, wor du büst. Dat du dat hörst: wees neet bang! Hebb man keen Nood! Ik, de Heer, ik sün d´r un denk um di. Dor denk um, geihst du nu in disse neeje Week: De Heer sien Engel is heel dicht bi un um de to, de Gott achten un ehren. He leet di neet hangen. (Psalm 34,8).
Jürgen Hoogstraat, Victorbur
